कर्णालीका आठ पालिका केन्द्र र बाजुराका चार वडा अझै सडक सञ्जाल बाहिर

सुदूरपश्चिमको बाजुरा जिल्लाका चार वडामा अझै सडक सञ्जाल पुगेको छैन। सडक नहुँदा त्यहाँका बासिन्दालाई दैनिक उपभोग्य सामान ओसार्न, बिरामीलाई स्वास्थ्य संस्था पुर्‍याउन र कृषि उपज बजार लैजान समस्या भएको छ। सामान्य कामका लागि पनि उनीहरू घण्टौँ पैदल हिँड्न बाध्य छन्।

चार नगरपालिका र पाँच गाउँपालिका गरी नौ स्थानीय तह रहेको बाजुराको कुल क्षेत्रफल २ हजार १ सय ८८ वर्ग किलोमिटर छ। त्यसमध्ये ८ सय ३० वर्ग किलोमिटर ओगटेको हिमाली गाउँपालिका क्षेत्रफलका हिसाबले जिल्लाकै सबैभन्दा ठूलो स्थानीय तह हो। हिमाली गाउँपालिकाका दुई वडामा सडक जोड्न बजेट छुट्याइए पनि ठेकेदारका कारण काम ढिलो भएको छ।

ठेक्का सम्झौता भए पनि कार्यान्वयन नहुँदा सडक विस्तार अघि बढ्न सकेको छैन। छिमेकी कर्णाली प्रदेशमा पनि ७९ स्थानीय तहमध्ये आठवटाको केन्द्रमा अझै मोटरबाटो पुगेको छैन। तीमध्ये डोल्पाका चार, कालीकोटका तीन र मुगुको एउटा पालिका केन्द्र राष्ट्रिय सडक सञ्जालमा जोडिन बाँकी छ।

त्यहाँ पनि दैनिक सामान मानिस र खच्चडले बोकेर ढुवानी गर्नुपरेको छ।