किम जोङ उन नयाँ पुल हुँदै वर्षदिनपछि चीन भ्रमणमा

उत्तर कोरियाका नेता किम जोङ उन चीन भ्रमणमा पुग्नुभएको दक्षिण कोरियाली समाचार संस्था योनहापले एक अज्ञात सरकारी स्रोतलाई उद्धृत गर्दै जनाएको छ। योनहापका अनुसार किम दुई देशलाई जोड्ने नयाँ अम्नोक नदी पुल पार गरेर चीनको लियाओनिङ प्रान्तस्थित सीमावर्ती सहर डान्डोङ पुग्नुभएको हो। चीनमा यालु नदी भनेर चिनिने यो नदीमाथिको पुलले उत्तर कोरियाको सिनुइजु सहरलाई डान्डोङसँग जोड्छ।

सन् २०१४ मा निर्माण सुरु भएको करिब ३ हजार २६ मिटर लामो चार लेनको यो पुलमा चीनले करिब ३१ करोड अमेरिकी डलर लगानी गरेको थियो। उत्तर कोरियातर्फको सडक र भन्सार पूर्वाधार तयार नहुँदा पुल करिब १२ वर्ष सञ्चालनमा आउन सकेको थिएन। यसै महिनादेखि सञ्चालनमा आएको पुलबाट चौबीसै घण्टा दुवैतर्फ ट्रक र कन्टेनर ओहोरदोहोर गर्न सकिन्छ।

दक्षिण कोरियाली सरकारका अनुसार यो एक वर्षयताको किमको पहिलो चीन भ्रमण हो। जापानी समाचार संस्था क्योदोका अनुसार डान्डोङका केही क्षेत्रमा कडा सवारी प्रतिबन्ध लगाइएको छ र होटलमा कोठा बुकिङ बन्द गरिएको छ। उत्तर कोरियाली सञ्चारमाध्यमले भने भ्रमणबारे कुनै जानकारी दिएका छैनन् र चिनियाँ विदेश मन्त्रालयले पनि आधिकारिक पुष्टि गरेको छैन।