मौरिससका श्रममन्त्रीसँग रास्वपा उपनेता पराजुलीको भेट, नेपाली श्रमिकको अधिकारमा छलफल

रास्वपा संसदीय दलका उपनेता गणेश पराजुलीले मौरिससका श्रम तथा औद्योगिक सम्बन्धमन्त्री मुहम्मद रेजा कासाम उतेमसँग भेटेर त्यहाँ कार्यरत नेपाली कामदारको अवस्थाबारे छलफल गर्नुभएको छ। पराजुलीको सचिवालयका अनुसार मौरिससमा करिब १४ हजार नेपाली श्रमिक कार्यरत छन्। अनौपचारिक भ्रमणका क्रममा भएको भेटमा ती श्रमिकको अधिकार, सुरक्षा र मर्यादित रोजगारी मुख्य विषय बनेका छन्।

श्रमिक भर्नासम्बन्धी द्विपक्षीय समझदारीपत्र प्रभावकारी रूपमा लागु गर्ने र कामदारलाई सुरक्षित, सम्मानजनक तथा न्यायपूर्ण कार्यस्थल दिलाउने विषयमा दुवै पक्षले धारणा राखेका छन्। श्रमसम्बन्धी विद्यमान व्यवस्था कार्यान्वयन गर्दै दुई देशबिचको सहकार्य बलियो बनाउने विषयमा कुराकानी भएको उपनेता पराजुलीले बताउनुभएको छ। नेपाल र मौरिससबिच कूटनीतिक सम्बन्ध स्थापना भएको करिब साढे चार दशक पुगेको सन्दर्भमा सम्बन्ध विस्तारबारे पनि छलफल भएको छ।

पर्यटन, संस्कृति र जनस्तरको सम्बन्ध बढाउने विषय भेटमा उठेको छ। पशुपतिनाथ र लुम्बिनीलाई जोडेर धार्मिक पर्यटन प्रवर्द्धन गर्ने सम्भावनाबारे पनि दुई पक्षबीच कुराकानी भएको छ।