यू–१९ एसिया कपका लागि २८ सदस्यीय प्रारम्भिक टोली, पोखरामा बन्द प्रशिक्षण

नेपाल क्रिकेट संघ, क्यानले १९ वर्षमुनिको एसिया कप क्रिकेटको तयारीका लागि २८ खेलाडीको प्रारम्भिक टोली शनिबार सार्वजनिक गरेको छ। ओमानमा आगामी नोभेम्बरमा हुने प्रतियोगिताका लागि छानिएका यी खेलाडी पोखरामा बन्द प्रशिक्षणमा सहभागी हुनेछन्। क्यानका अनुसार प्रशिक्षणका क्रममा खेलाडीको क्षमता, लय र फिटनेस जाँचेर अन्तिम टोली टुङ्गो लगाइनेछ।

प्रारम्भिक सूचीमा निरज यादव, निश्चल क्षेत्री, आशिष लुहार, नितेश पटेल, चन्दन राम, वंश क्षेत्री, सुशील रावल, शुभम खनाल, अभय यादव, सचिन भट्ट, सूर्यांशु कोइराला, परिमार्जन यादव, प्रसिद्ध जैसी, विपिन शर्मा र रोशन शाहीलगायत छन्। दर्शन सोनार, जोय थापा, सोहेल कुँवर, रोहित चन्द, राहुल हक, आशिक बैठा, सुगम बुढाथोकी, दीपक सेमेला र रौनक श्रीवास्तवले पनि सूचीमा ठाउँ पाएका छन्। छनोटमा परेका खेलाडीले आइतबारसम्म कास्की जिल्ला क्रिकेट संघ, पोखरामा सम्पर्क गर्नुपर्ने क्यानले जनाएको छ।

कोशी प्रदेश क्रिकेट संघका सचिव टीकाराम पुरीका अनुसार २८ मध्ये पाँच खेलाडी कोशी प्रदेशका हुन्। तीमध्ये झापाका तीन जना छन् भने मोरङका क्रितिक कामत र इलामका शिवांश बजगाईं एक–एक जना छन्। झापाका भूपाल डंगोल र सौजन घिमिरे पनि यही समूहमा पर्छन्।

भूपालबाहेक कोशीका अन्य चार खेलाडी १६ वर्षमुनिको अन्तर्राष्ट्रिय प्रतियोगितामा खेलिसकेको सचिव पुरीले बताउनुभएको छ।