अरुण–३ को बिजुली भारत पठाउने प्रसारण लाइनको काम आधाभन्दा बढी सकियो

अरुण–३ जलविद्युत् आयोजनाको बिजुली भारत पुर्‍याउन बनाइँदै गरेको ४०० केभी क्षमताको प्रसारण लाइनको भौतिक प्रगति करिब ६० प्रतिशत पुगेको छ। ९०० मेगावाट क्षमताको अरुण–३ संखुवासभामा निर्माणाधीन छ। आयोजनाले बिजुली उत्पादन थाल्दासम्म प्रसारण लाइन पनि सक्ने लक्ष्य राखेर काम अघि बढाइएको छ।

यो लाइन दिदिङबाट भोजपुर, खोटाङ र उदयपुर हुँदै सिरहा, महोत्तरी र धनुषाको ढल्केबर पार गरी भारतीय सीमाको बथनाहासम्म पुग्नेछ। करिब २१७ किलोमिटर लामो यही लाइन अरुण–३ को बिजुली भारतीय बजारसम्म लैजाने मुख्य पूर्वाधार हो। लगानी बोर्डका सिनियर डिभिजनल इन्जिनियर तथा आयोजना प्रमुख दीपक मुडभरीका अनुसार मुआब्जा बाँड्ने, वन क्षेत्रका रूख काट्ने र टावर ठड्याउने काम एकैसाथ भइरहेको छ।

जग्गासम्बन्धी समस्या सुल्झाउन सम्बन्धित निकायसँग समन्वय गरिएको उहाँले बताउनुभएको छ।