रास्वपाको 'क्यान्डिडेट क्लब' अनैतिक राजनीति: आजपा अध्यक्ष प्रभु साह

आम जनता पार्टी, आजपाका अध्यक्ष प्रभु साहले राष्ट्रिय स्वतन्त्र पार्टी, रास्वपाको 'क्यान्डिडेट क्लब' लाई अनैतिक राजनीतिको सुरुवात भन्नुभएको छ। शनिबार वीरगञ्जमा बसेको आजपा मधेस प्रदेश कमिटीको बैठकलाई सम्बोधन गर्दै उहाँले यस्तो बताउनुभएको हो। रास्वपाले उम्मेदवार छनोटका लागि यो क्लब गठन गर्ने घोषणा गरेको छ।

साहका अनुसार स्थानीय तहलाई दलविहीन बनाउने भन्दै मत माग्ने रास्वपाले नै उम्मेदवार छान्न क्लब बनाउनु विरोधाभास हो। रास्वपाका नेता कार्यकर्तामा देश र जनताभन्दा पद र कुर्सीको चिन्ता बढी देखिएको उहाँको आरोप छ। पूर्वमन्त्रीसमेत रहिसक्नुभएका साहले रौतहटको गरुडामा अग्रगामी मोर्चा नगर कमिटीको शुभकामना कार्यक्रममा पनि सत्तारुढ दल रास्वपाको आलोचना गर्नुभएको छ।

त्यहाँ उहाँले 'घण्टीहरूलाई कुर्सीको मात्र चिन्ता छ' भन्नुभएको छ। उहाँका अनुसार रास्वपाको पार्टी पंक्ति चुनाव जित्ने र पद पाउने चिन्तामा मात्र केन्द्रित छ।