कात्तिकमा १८ दिन बिदा, सरकारी कार्यालय १२ दिन मात्र खुल्ने

यस वर्ष कात्तिकभरि सरकारी कार्यालयहरू १२ दिन मात्र सेवा दिने भएका छन्। दशैँ, तिहार, नेपाल संवत् र छठ पर्वका बिदा तथा साप्ताहिक बिदा जोड्दा ३० दिनको यो महिनामा १८ दिन बिदा परेको छ। सातामा दुई दिन बिदा दिने व्यवस्था लागू भएपछि कात्तिक ८ र १५ गतेका आइतबार पनि बिदाका रूपमा गनिएका छन्।

कात्तिक १ गतेदेखि लगातार आठ दिन बन्द रहेका सरकारी कार्यालय ९ गते सोमबार खुल्नेछन्। त्यसपछि १०, ११, १२ र १३ गते पनि कार्यालय खुला रहनेछन्। १४ र १५ गते बिदा परेपछि कार्यालय फेरि १६, १७, १८, १९ र २० गते खुल्नेछन्।

त्यसपछि २१ देखि २६ गतेसम्म लगातार छ दिन सरकारी कार्यालय बन्द रहनेछन्। सरकारी क्यालेन्डरअनुसार कात्तिक २७ गते र ३० गते कार्यालय खुला रहनेछन् भने बीचका २८ र २९ गते बिदा रहनेछ। यसअघि ३१ दिनको असोजमा पनि सरकारी कार्यालय २२ दिन मात्र सञ्चालनमा थिए।

यसअनुसार असोजमा ९ दिन कार्यालय बन्द थिए।