दसैँमा पृथ्वी राजमार्गमा सवारीको चाप घट्यो

बडादसैँमा राजधानीबाट गृहजिल्ला जाने यात्रुको आवागमन जारी रहे पनि पृथ्वी राजमार्गमा यसपटक सवारीको चाप अघिल्ला वर्षको तुलनामा निकै कम देखिएको छ। दसैँको बिदाका कारण राजमार्ग किनारका साना खानपिन पसल र होटल धेरैजसो बन्द छन्। मलेखुका माछा होटल र बेनिघाटका स्टाफ होटलमा भने यात्रामा निस्केका मानिसको राम्रै चहलपहल छ।

सडकमा ठूला मालवाहक ट्रकको उपस्थिति नगण्य छ। त्यसको साटो यात्रु बोक्ने हायस, निजी गाडी र हरियो नम्बर प्लेट भएका पर्यटकीय सवारी बढी गुडिरहेका छन्। समूह बनाएर यात्रा गरिरहेका मोटरसाइकल र स्कुटर चालक पनि ठूलो सङ्ख्यामा देखिएका छन्।

राजमार्गका कतिपय खण्डमा भने यात्रा जोखिमपूर्ण बनेको छ। कतै धुलो उडिरहेको छ भने कतै सडक हिलाम्मे छ। ठाउँठाउँमा परेका खाल्डाखुल्डीले सवारी चलाउन थप कठिन बनाएका छन्।

यस्तो सडकमा दुईपाङ्ग्रे सवारी चालकलाई विशेष सास्ती भएको छ र उनीहरू चिप्लिएर लड्ने खतरा छ। जल तथा मौसम विज्ञान विभागका अनुसार आज काठमाडौँ र पोखरामा आंशिक बदली रहने र वर्षाको सम्भावना छैन। भोलि भने कोशी, बागमती र गण्डकी प्रदेशका पहाडी भागका एक-दुई स्थानमा मेघगर्जनसहित हल्का वर्षाको सम्भावना रहेको विभागले जनाएको छ।