एनपीएल–३: पोखरामा करुणारत्ने, विराटनगर किंग्सको नयाँ साझेदार

पोखरा एभेन्जर्सले नेपाल प्रिमियर लिग, एनपीएलको तेस्रो संस्करणका लागि श्रीलंकाका पेस बलिङ अलराउन्डर चमिका करुणारत्नेलाई अनुबन्ध गरेको छ। ३० वर्षीय करुणारत्ने पोखराले भित्र्याएका तेस्रो विदेशी खेलाडी हुन्। उनले श्रीलंकाका लागि १ टेस्ट, २६ एकदिवसीय र ४६ अन्तर्राष्ट्रिय टी-ट्वान्टी खेलेका छन्।

सबै प्रकारका टी-ट्वान्टीमा उनले १५० खेलमा १०१ विकेट लिएका छन्। हालै जापानमा सम्पन्न २०औँ एसियाली खेलकुदमा पनि उनी सहभागी थिए। पोखराले यसअघि नै शकिब अल हसन र धनञ्जय लक्षणलाई विदेशी खेलाडी तथा अजन्था मेन्डिसलाई मुख्य प्रशिक्षकका रूपमा अनुबन्ध गरिसकेको छ।

करुणारत्नेसँगै आकाश चन्द र धनञ्जय लक्षणले टोलीको मध्यम गतिको बलिङमा साथ दिनेछन्। यता, विराटनगर किंग्सले बागमती प्लाष्टिकसँग आधिकारिक घरेलु साझेदारीको सम्झौता गरेको छ। आइतबार विराटनगरमा भएको कार्यक्रममा दुवै पक्षले तेस्रो संस्करणभर सहकार्य गर्ने सहमति गरेका हुन्।

सम्झौताअनुसार खेलाडीको ट्राउजरमा बागमतीको लोगो रहनेछ। पहिलो संस्करणमा किंग्ससँग रहेको यो कम्पनी दोस्रो संस्करणमा अलग थियो। कम्पनीका कार्यकारी प्रमुख अधिकृत अमित राठीका अनुसार केही दिनको निरन्तर छलफलपछि यसपटक सहमति जुटेको हो।

किंग्सको टोली हाल भारतमा अभ्यास गरिरहेको छ।