मङ्गलको चन्द्रमा फोबोसबाट नमूना ल्याउने जापानी मिसनको तयारी

जापानले मङ्गल ग्रहको चन्द्रमा फोबोसको नमूना पृथ्वीमा ल्याउने एमएमएक्स अभियान प्रक्षेपण गर्ने तयारी गरेको छ। जापान एयरोस्पेस एक्सप्लोरेसन एजेन्सी जाक्साका अनुसार तानेगासिमा अन्तरिक्ष केन्द्रबाट एच–३ रकेटले यो यान मङ्गलबार बिहान ४:४१ बजे उडाउनेछ। योजनाअनुसार यान करिब एक वर्षमा मङ्गलको नजिक पुग्नेछ र झन्डै तीन वर्ष फोबोसको परिक्रमा गर्दै कम्तीमा १० ग्राम नमूना जम्मा गर्नेछ।

फ्रान्सेली कार्टुन पात्र एस्टेरिक्सको कुकुरको नाममा राखिएको ‘इडिफिक्स’ रोभरले अवतरणयोग्य स्थान खोज्न सतह नियाल्नेछ। परियोजना प्रबन्धक यासुहिरो कावाकात्सुले मङ्गल प्रणालीबाट नमूना लिएर पृथ्वी फर्किने यो विश्वकै पहिलो अभियान हुने बताउनुभएको छ। वैज्ञानिकहरूले यस अभियानबाट मङ्गल र यसका चन्द्रमाको उत्पत्ति, सौर्यमण्डलको निर्माण र पृथ्वीमा जीवनको सुरुआतबारे नयाँ जानकारी पाउने अपेक्षा गरेका छन्।