पुनर्निर्मित मर्भुङकोट मन्दिर आईजीपी कार्कीद्वारा उद्घाटन

प्रहरी महानिरीक्षक दानबहादुर कार्कीले गुल्मीको मालिका गाउँपालिका–८, मर्भुङस्थित पुनर्निर्मित खडक भगवती मर्भुङकोट मन्दिरको आइतबार उद्घाटन गर्नुभएको छ। करिब ५०० वर्ष पुरानो मानिने यो मन्दिर महानिरीक्षक कार्कीको गृहजिल्लामा पर्छ। मन्दिर व्यवस्थापन समितिका अध्यक्ष मनबहादुर थापाको अध्यक्षतामा भएको समारोहमा कार्की प्रमुख अतिथि हुनुहुन्थ्यो।

उद्घाटनका क्रममा उहाँले मन्दिर पुर्खाको पौरख र नयाँ पुस्तालाई प्रेरणा दिने जीवन्त पाठशाला भएको बताउनुभएको छ। धार्मिक पर्यटनको सम्भावना भएको यस क्षेत्रमा सडक, खानेपानी, शौचालय र विश्रामस्थल बनाउन तीनै तहका सरकार र सरोकारवालाबीच समन्वय चाहिने उहाँको भनाइ छ। देवी पुज्ने समाजमै महिलामाथि अन्याय हुनु विरोधाभास भएको बताउँदै उहाँले घरेलु हिंसा, बोक्सीको आरोप, छाउपडी, दाइजो र बालविवाहजस्ता कुप्रथा अन्त्य गर्नुपर्नेमा जोड दिनुभएको छ।

अध्यक्ष थापाका अनुसार पुनर्निर्माणपछि मन्दिरको संरक्षण र धार्मिक गतिविधि थप व्यवस्थित हुनेछन्। मालिका गाउँपालिकाका अध्यक्ष देवीराम अर्यालसहित मदाने, धुर्कोट र इस्मा गाउँपालिकाका अध्यक्षहरू पनि कार्यक्रममा उपस्थित थिए। जिल्ला प्रहरी कार्यालय गुल्मीका अनुसार कार्यक्रम व्यवस्थित बनाउन ६४ जना प्रहरी परिचालन गरिएको थियो।