मध्यावधि निर्वाचनअघि अमेरिकाभर ट्रम्पविरुद्ध ‘नो किंग्स’ प्रदर्शन

नोभेम्बर ३ को मध्यावधि निर्वाचनअघि राष्ट्रपति डोनाल्ड ट्रम्पको नीतिको विरोधमा शनिबार अमेरिकाभर ‘नो किंग्स’ प्रदर्शन आयोजना भएको छ। ट्रम्प दोस्रो कार्यकालका लागि सत्तामा फर्किएपछि यो अभियानको चौथो शृङ्खला हो। यसअन्तर्गत देशभर करिब ३ हजार कार्यक्रम भएका छन्।

वासिङ्टन डिसी, न्युयोर्क, लस एन्जलस, एटलान्टादेखि साना सहरसम्म जुलुस, सङ्गीत कार्यक्रम र सवारीसाधनको हर्न बजाएर विरोध गरिएको छ। यस पटक आयोजकले विरोधसँगै मतदाता दर्ता जाँच गर्न, प्रारम्भिक मतदान सुविधा प्रयोग गर्न र चाँडै मत हाल्न नागरिकलाई आग्रह गरेका छन्। वासिङ्टनको लिंकन मेमोरियलमा भेला भएका प्रदर्शनकारीले ‘चाँडै मतदान गर्नुहोस्’ र ‘मेरो मतमाथि हस्तक्षेप नगर’ लेखिएका प्लेकार्ड बोकेका छन्।

चिसो मौसमबीच पनि सहभागीले सङ्गीतसँगै मतदानको सन्देश फैलाएका छन्। वासिङ्टनकी ६६ वर्षीया सेवानिवृत्त शिक्षिका सबिन कार्लसनले विरोधभन्दा मतदान झन् जरुरी रहेको भन्दै मतदातालाई आफ्नो मतदान केन्द्र र दर्ता विवरण जाँच्न आग्रह गर्नुभएको छ।