हुम्लाको नारा लेक सडकमा हिउँ पन्छाउने काम जारी

हुम्लाको नाम्खा गाउँपालिका–५ स्थित नारा लेकको सडकमा जमेको हिउँ हटाउने काम बाह्रौँ दिनसम्म पनि जारी छ। असोज १० र ११ गते तथा त्यसपछि दुई पटक परेको हिमपातले सडकमा तीन फिटदेखि चार मिटरसम्म अग्लो हिउँ थुप्रिएको छ। नारा क्षेत्रको १० किलोमिटर सडकमा धेरै हिउँ जमेको छ।

हिल्सा–सिमकोट सडक योजनाले असोज २१ गतेदेखि एउटा मात्र जेसिबी लगाएर हिउँ हटाउन थालेको हो। योजनाका इन्जिनियर कुशल भुसालका अनुसार एउटा मात्र जेसिबी भएकाले आइतबारसम्म पनि काम सकिएको छैन। अब केही मिटर मात्र हिउँ हटाउन बाँकी छ।

दसैँ मनाउन घर फर्कन चाहने स्थानीयका लागि सडक छिटो खुलाउनुपर्ने दबाब छ। जल तथा मौसम विज्ञान विभागका अनुसार आज कर्णाली प्रदेशको हिमाली भू-भागमा मौसम मुख्यतया सफा छ। भोलि त्यहाँ आंशिक बदली हुनेछ भने हिमाली भू-भागका एक–दुई स्थानमा मेघगर्जनसहित हल्का वर्षा वा हिमपातको सम्भावना छ।