कोशीका गेमचेन्जर आयोजना: केही अन्तिम चरणमा, केही सुस्त

कोशी प्रदेशका 'गेमचेन्जर' मानिएका ठूला आयोजनामध्ये केही निर्माणको अन्तिम चरणमा पुगेका छन् भने केही सुस्त गतिमा अघि बढिरहेका छन्। नेपाल राष्ट्र बैंकको प्रादेशिक प्रतिवेदनअनुसार मुआब्जा विवाद, बजेट व्यवस्थापन र ठेकेदारका भित्री समस्याले कतिपय आयोजना ढिलो भएका छन्। अरुण तेस्रो जलविद्युत् आयोजना, कोशी करिडोर प्रसारण लाइन, पुष्पलाल मध्यपहाडी लोकमार्ग र हुलाकी राजमार्ग प्रदेशका प्रमुख आयोजनामा पर्छन्।

मदन भण्डारी राजमार्ग, उत्तर–दक्षिण कोशी सडक, महेन्द्र राजमार्ग स्तरोन्नति तथा तमोर र अरुण करिडोर सडक आयोजना पनि कार्यान्वयनमा छन्। यी आयोजना सम्पन्न भए कोशी प्रदेश दक्षिण एसियाकै प्रमुख आर्थिक र व्यापारिक ट्रान्जिट केन्द्र बन्न सक्ने सम्भावना देखिएको छ। तर जग्गा अधिग्रहण, बजेट बाँडफाँड, इन्धन र निर्माण सामग्रीको अभाव तथा नीतिगत अस्पष्टताले काममा बाधा पुर्‍याएका छन्।

सङ्घ, प्रदेश र स्थानीय गरी तीन तहका सरकारबीच समन्वयको कमी पनि अर्को मुख्य चुनौतीका रूपमा देखिएको छ।