कमला–ढल्केबर–पथलैया सडक विस्तार: धेरै समय बित्यो, काम थोरै

पूर्व–पश्चिम महेन्द्र राजमार्गको कमला–ढल्केबर–पथलैया खण्ड चार लेनमा विस्तार गर्ने काम निकै ढिलो भएको छ। सम्झौताअनुसारको समयको ६८ प्रतिशत बितिसक्दा निर्माण व्यवसायीले ३० प्रतिशत मात्र काम सकेका छन्। राष्ट्रिय गौरवको यस आयोजनाअन्तर्गत धनुषाको कमला पुलदेखि सर्लाहीको बागमती पुलसम्म ७४.७५ किलोमिटर सडक ३ वर्षमा विस्तार गर्न ३ खण्डमा ठेक्का लागेको छ।

बजार क्षेत्रमा ६ लेन र अन्य भागमा ४ लेन बनाउने योजना छ। कमला पुलदेखि बडहरीसम्मको २२ किलोमिटरको पहिलो खण्डको काम भारतको इकेके इन्फ्रास्ट्रक्चर लिमिटेडले गरिरहेको छ। दोस्रो खण्ड बडहरीदेखि सर्लाहीको फूलजोरसम्म छ।

आयोजना प्रमुख एवं सिनियर डिभिजनल इन्जिनियर राजेशकुमार दासका अनुसार काम तालिकाभन्दा ३० प्रतिशतभन्दा बढीले पछि परेको छ। यही गतिमा ३ वर्षभित्र विस्तार नसकिने र म्याद थप्नैपर्ने अवस्था आएको उहाँले बताउनुभएको छ।