अस्थायी मर्मतपछि बागलुङका सडक सञ्चालनमा, दसैँ यात्रा सहज

असोजको बाढीपहिरोले क्षति पुर्‍याएका बागलुङका राष्ट्रिय राजमार्गदेखि ग्रामीण सडकसम्म अस्थायी मर्मतपछि फेरि सञ्चालनमा आएका छन्। यसबाट दसैँका लागि घर फर्किने यात्रुको आवागमन सहज भएको छ। असोज ९ देखि ११ गतेसम्मको अविरल वर्षाले मध्यपहाडी लोकमार्ग, कालीगण्डकी करिडोर र बागलुङ–बेनी सडकसहित प्रदेशस्तरीय तथा ग्रामीण सडक अवरुद्ध भएका थिए।

सडक डिभिजन कार्यालय बागलुङका प्रमुख हरि सुवेदीका अनुसार मालढुङ्गा पुलको पहुँचमार्ग, बागलुङ–बेनी सडक र मध्यपहाडी लोकमार्गको गलकोट तथा निसीखोला खण्डमा मर्मतपछि सवारी चल्न थालेको छ। मालढुङ्गा पुलको पहुँचमार्ग १५ दिनपछि र गलकोट–ताराखोला सडक १७ दिनपछि खुलेका थिए। सुवेदीका अनुसार डिभिजन कार्यालयअन्तर्गतका राष्ट्रिय तथा सहायक राजमार्गमा करिब ३० करोड रुपैयाँको क्षति पुगेको छ।