मिठाईमा सामग्री, म्याद र मूल्य खुलाउन खाद्य विभागको निर्देशन

मिठाई बेच्ने व्यवसायीले अब पसलमा मिठाईको नाम, मुख्य सामग्री, प्रयोग भएको तेल वा घिउको किसिम, खान मिल्ने अन्तिम मिति र प्रतिकिलो दर अनिवार्य रूपमा देखाउनुपर्ने भएको छ। खाद्य प्रविधि तथा गुण नियन्त्रण विभागले शुक्रबार सूचना जारी गर्दै यस्तो निर्देशन दिएको हो। खाद्य स्वच्छता र गुणस्तर सुनिश्चित गर्न यो निर्देशन दिइएको विभागले जनाएको छ।

यो निर्देशन मिठाई बनाउने र बिक्री वितरण गर्ने दुवै खाले व्यवसायीमा लागू हुन्छ। मिठाई पसल, होटल र मिठाई भण्डारले ग्राहकले सजिलै देख्ने ठाउँमा यी विवरण राख्नुपर्नेछ। मिठाई तयार गर्दा प्रयोग गरिएका कच्चा पदार्थको जानकारी पनि स्पष्ट रूपमा लेख्नुपर्ने विभागले जनाएको छ।

यसले ग्राहकलाई किन्न लागेको मिठाईको सामग्री, खान मिल्ने अवधि र मूल्य थाहा पाउन सजिलो हुने विभागको अपेक्षा छ।