भोटेकोशी बाढी प्रभावितका लागि २९ संस्थाको अस्थायी आवास प्रस्ताव

भोटेकोशी बाढी प्रभावित परिवारलाई अस्थायी आवास बनाइदिन २९ वटा स्वदेशी तथा विदेशी संघसंस्था अघि सरेका छन्। ती संस्थाले ७ हजार ६२४ परिवारका लागि अस्थायी घर बनाउने प्रस्ताव राष्ट्रिय विपद् जोखिम न्यूनीकरण तथा व्यवस्थापन प्राधिकरणमा बुझाएका छन्। प्रस्तावित कुल लगानी २ अर्ब रुपैयाँभन्दा बढी रहेको बताइएको छ।

प्रस्ताव गर्नेमा रेडक्रस, सेभ द चिल्ड्रेन, केयर नेपाल, पिपुल इन निड र चौधरी फाउन्डेसनलगायत संस्था छन्। संयुक्त राष्ट्रसंघीय परियोजना सेवा कार्यालय, यूएनओपीएसले सबैभन्दा धेरै २ हजार १५८ परिवारका लागि आवास बनाउने इच्छा देखाएको छ। क्याथोलिक रिलिफ सर्भिसेजले प्रतिघर ५ लाख रुपैयाँका दरले १ हजार संरचनामा ५० करोड रुपैयाँ खर्च गर्ने प्रस्ताव गरेको छ।