उत्तर कोरियाद्वारा एआईयुक्त टारपिडो परीक्षण

उत्तर कोरियाले कृत्रिम बौद्धिकता अर्थात् एआईको सहायताले लक्ष्य पहिचान गर्ने र आक्रमणको बाटो तय गर्ने नयाँ तीव्र गतिको टारपीडो परीक्षण गरेको जनाएको छ। सरकारी समाचार संस्था केसीएनएका अनुसार बिहीबार 'सुपर–स्पिड जाम–२.०' नामको टारपीडो पानीमुनि परीक्षण गरिएको हो। प्योङयाङका अनुसार यो प्रणाली विकास गर्ने क्रममा पछिल्ला ५ वर्षमा १८० भन्दा बढी परीक्षण भइसकेका छन्।

यो परीक्षणले कोरियाली प्रायद्वीपमा हतियारको होडबाजी अझ चर्किने सङ्केत गरेको छ। केही दिनअघि मात्र उत्तर कोरियाले पनडुब्बीबाट २ प्रकारका क्रुज क्षेप्यास्त्र परीक्षण गरेको घोषणा गरेको थियो। विश्लेषकहरूका अनुसार युक्रेन युद्धमा रुसलाई सघाउन सेना पठाएबापत मस्कोबाट पाउन सक्ने सहयोगले उत्तर कोरियाको हतियार प्रविधि विकासलाई गति दिन सक्छ।

क्युङनाम विश्वविद्यालयका प्राध्यापक लिम युल–चुलका अनुसार एआईले वास्तविक लक्ष्य र झुक्याउन राखिएका नक्कली लक्ष्य छुट्याउन टारपीडोलाई मद्दत गर्न सक्छ।