ट्रम्पको निर्णयप्रति असन्तुष्ट जेलेन्स्की, रुसमाथि प्रतिबन्धको माग

अमेरिकी राष्ट्रपति डोनाल्ड ट्रम्पले रुसविरुद्ध प्रस्तावित व्यापक प्रतिबन्ध रोकेपछि युक्रेनका राष्ट्रपति भोलोदिमिर जेलेन्स्कीले उक्त निर्णयलाई दुर्भाग्यपूर्ण भन्नुभएको छ। रुसी अर्थतन्त्रलाई निसाना बनाउने प्रतिबन्ध अघि नबढाउने ह्वाइट हाउसको निर्णयको केही घण्टामै उहाँले नयाँ अमेरिकी प्रतिबन्धको पक्षमा आवाज उठाउन समर्थकहरूलाई आह्वान गर्नुभएको छ। सामाजिक सञ्जालमा जेलेन्स्कीले अमेरिकाले 'लिन्ड्से ग्राहम ऐन' पूरै पन्छाएको उल्लेख गर्दै उक्त ऐनले रुसमाथि दबाब बढाएर युद्ध टुंग्याउन सघाउने अपेक्षा रहेको बताउनुभएको छ।

वासिङ्टनसँग पछिल्लो समय तनाव बढे पनि उहाँले ट्रम्पको सिधा आलोचना भने गर्नुभएको छैन। रुसले युक्रेनका १५ भन्दा बढी स्थानमा ऊर्जा पूर्वाधारमाथि आक्रमण गरेको र त्यसको गम्भीर असर परेको बताइएको छ। रुसी आक्रमण तीव्र भइरहेका बेला यो निर्णय आएकाले जाडोमा युक्रेनको सुरक्षा जोखिम बढ्ने चिन्ता उत्पन्न भएको छ।

यस्ता आक्रमणले युक्रेनको प्रतिरोध क्षमतामा असर पार्ने र जाडोमा अत्यावश्यक सेवा सञ्चालन थप कठिन बनाउने चेतावनी दिइएको छ।