पहाडमा आंशिक बदली, तराईमा बिहान कुहिरो; भोलि हिमालमा हल्का वर्षा–हिमपात

आज तराईका केही स्थानमा बिहानपख हुस्सु र कुहिरो लाग्ने पूर्वानुमान छ। हाल देशमा पश्चिमी वायुको आंशिक असर रहेको जनाइएको छ। हिमाली भू-भाग र कोशी, बागमती, गण्डकी तथा लुम्बिनीका पहाडमा आंशिक बादल लाग्ने छ भने कर्णाली र सुदूरपश्चिमका पहाडी क्षेत्रमा मौसम मुख्यतया सफा रहने छ।

कोशी, गण्डकी र कर्णालीका हिमाली क्षेत्रका एक-दुई स्थानमा हल्का वर्षा वा हिमपात हुन सक्ने उल्लेख छ। भोलि हिमाली र पहाडी दुवै भू-भागमा आंशिक बदली रहने छ। मधेश, कोशी, बागमती र गण्डकीको तराईमा पनि आंशिक बादल लाग्ने छ भने लुम्बिनी र सुदूरपश्चिमको तराईमा मौसम मुख्यतया सफा रहने छ।

हिमाली भू-भाग र कोशी, बागमती तथा गण्डकीका पहाडका एक-दुई ठाउँमा मेघगर्जन तथा चट्याङसँगै हल्का पानी वा हिउँ पर्न सक्ने बताइएको छ। प्रमुख सहरमध्ये जनकपुरमा २० डिग्री सेल्सियस, विराटनगर र नेपालगञ्जमा १९ डिग्री, पोखरामा १७ डिग्री तथा काठमाडौँ र वीरेन्द्रनगरमा १३ डिग्री सेल्सियस तापक्रम रहने अनुमान छ। यी छवटै सहरमा वर्षाको सम्भावना शून्य प्रतिशत छ।

विराटनगर, जनकपुर र नेपालगञ्जमा बिहान हुस्सु लाग्ने छ भने पोखरा र काठमाडौँमा आंशिक बदली र वीरेन्द्रनगरमा मौसम सफा रहने छ।