फूलपातीमा पहाडमा आंशिक बादल, हिमालमा हल्का वर्षा–हिमपात, तराईमा बिहान कुहिरो

जल तथा मौसम विज्ञान विभागले आज देशका पहाडी भू-भागमा आंशिक बदली र हिमाली भू-भागमा साधारणतया बदली रहने जनाएको छ। कोशी, गण्डकी, कर्णाली र सुदूरपश्चिम प्रदेशका हिमाली क्षेत्रका एक-दुई स्थानमा हल्का वर्षा वा हिमपात हुन सक्ने विभागको पूर्वानुमान छ। तराईका केही स्थानमा बिहानपख हुस्सु र कुहिरो लाग्ने उल्लेख छ।

विभागका अनुसार हाल देशमा पश्चिमी वायुको आंशिक असर छ र आजसम्म पश्चिमी न्यूनचापीय प्रणालीको पनि आंशिक असर रहने सम्भावना छ। भोलि कोशी, बागमती र गण्डकीका हिमाली भू-भागमा साधारणतया बदली तथा अन्य प्रदेशका हिमाली क्षेत्रमा आंशिक बदली रहनेछ। लुम्बिनी र सुदूरपश्चिमको तराईमा भोलि मौसम मुख्य रूपमा सफा रहने र मधेशसहित अन्य तराईमा आंशिक बदली हुने जनाइएको छ।

भोलि हिमाली क्षेत्र र कोशी, बागमती तथा गण्डकीका पहाडका एक-दुई ठाउँमा मेघगर्जन र चट्याङसहित हल्का वर्षा वा हिमपातको सम्भावना छ। काठमाडौँमा तापक्रम १४ देखि १६ डिग्री सेल्सियस रहने र वर्षाको सम्भावना नरहेको विभागले जनाएको छ। पोखरामा १७ देखि १९ डिग्री तापक्रमसँगै चट्याङसहित हल्का वर्षाको ३० प्रतिशत सम्भावना छ।

विराटनगरमा १९ देखि २१ डिग्री र जनकपुर तथा नेपालगञ्जमा २० देखि २२ डिग्री सेल्सियस तापक्रम रहने अनुमान छ। वीरेन्द्रनगरमा १६ देखि १८ डिग्री तापक्रमसहित आंशिक बदली रहनेछ।