पश्चिमी वायुको आंशिक प्रभाव: हिमालमा बदली, कतै वर्षा र हिमपात

देशमा पश्चिमी वायुको आंशिक असर कायम रहेकाले आज हिमाली क्षेत्रमा प्रायः बदली रहने र केही स्थानमा वर्षा तथा हिमपात हुने सम्भावना रहेको जल तथा मौसम विज्ञान विभागले जनाएको छ। विभागका अनुसार आज र भोलि पश्चिमी न्यूनचापीय प्रणालीको आंशिक प्रभाव रहनेछ। गण्डकी, लुम्बिनी, कर्णाली र सुदूरपश्चिमका हिमाली क्षेत्रका थोरै स्थान र पहाडका एक-दुई स्थानमा चट्याङसहित मध्यमसम्मको वर्षा वा हिमपात हुन सक्छ।

कोशी र बागमतीका हिमाल र पहाडका एक-दुई ठाउँमा भने हल्का वर्षा वा हिमपातको सम्भावना छ। लुम्बिनी र सुदूरपश्चिमको तराईमा आंशिक बदली रहने र अन्य तराईमा मौसम प्रायः सफा रहने विभागले उल्लेख गरेको छ। पोखरामा आज २८ देखि ३० डिग्री सेल्सियस तापक्रम र २० प्रतिशत वर्षाको सम्भावना छ।

काठमाडौँमा २५ देखि २७ र वीरेन्द्रनगरमा २९ देखि ३१ डिग्री सेल्सियस तापक्रम रहने अनुमान छ। नेपालगञ्ज, विराटनगर र जनकपुरमा तापक्रम ३२ देखि ३४ डिग्री सेल्सियससम्म पुग्ने विभागको पूर्वानुमान छ। भोलि हिमाली क्षेत्रमा प्रायः बदली र पहाडमा आंशिक बदली रहनेछ।

बागमती, गण्डकी, लुम्बिनी र सुदूरपश्चिमको तराईका केही स्थानमा भोलि बिहानपख हुस्सु वा कुहिरो लाग्न सक्छ। भोलि हिमालका एक-दुई ठाउँमा हल्का वर्षा वा हिमपातको सम्भावना रहेको विभागले जनाएको छ।