दसैँ यात्राका समस्यामा रक्षा बमको सरकारलाई ध्यानाकर्षण

जेनजी अभियन्ता रक्षा बमले दसैँ मनाउन घर फर्किरहेका यात्रुले भोगिरहेका यातायात र खानपानका समस्यामा सरकारको ध्यानाकर्षण गराउनुभएको छ। सामाजिक सञ्जालमा लेख्दै उहाँले बसमा क्षमताभन्दा धेरै यात्रु कोचिएको गुनासो आइरहेको उल्लेख गर्नुभएको छ। राजमार्गका होटलमा रातिको यात्रामा यात्रुले महँगो मूल्य तिरेर पनि कमसल खाना खानुपरेको उहाँको भनाइ छ।

यस्ता समस्या सुधार्न ३०–३५ वर्ष नलाग्ने र ६ महिनाभित्रै केही काम गर्न सकिने उहाँले बताउनुभएको छ। दैनिक जीवनका समस्या समाधान गर्ने आँट देखेर नागरिकले मत दिएको उहाँले स्मरण गराउनुभएको छ। अब नागरिकले सरकारको काम गर्ने क्षमता मूल्याङ्कन गरिरहेको भन्दै उहाँले सरकारलाई सचेत गराउनुभएको छ।

नेपाली जनता फेसबुक र टिकटक चलाउनमा मात्र सीमित नरहेको र विषयवस्तुबारे सोच्ने गरेको पनि उहाँको टिप्पणी छ। दसैँको यात्रामा निस्केकाहरूका लागि जल तथा मौसम विज्ञान विभागले आज गण्डकी, लुम्बिनी, कर्णाली र सुदूरपश्चिमका पहाडी भागका एक–दुई स्थानमा मेघगर्जनसहित वर्षाको सम्भावना औँल्याएको छ। भोलि बागमती, गण्डकी, लुम्बिनी र सुदूरपश्चिमका तराईका केही स्थानमा बिहानपख हुस्सु र कुहिरो लाग्ने विभागको पूर्वानुमान छ।