अभिनेता इमरान खानलाई अक्टोबर २८ भित्र भारत छाड्न निर्देशन

बलिउड अभिनेता इमरान खानलाई भारतका अधिकारीहरूले अक्टोबर २८ भित्र देश छाड्न निर्देशन दिएका छन्। मुम्बईस्थित विदेशी क्षेत्रीय दर्ता कार्यालयले यससम्बन्धी सूचना जारी गरेको हो। अभिनेता आमिर खानका भान्जा इमरान अक्टोबर १० मा मुम्बईको अगस्ट क्रान्ति मैदानमा भएको विरोध प्रदर्शनमा सहभागी भएका थिए।

कक्रोच जनता पार्टीले आयोजना गरेको उक्त प्रदर्शनमा मुख्य निर्वाचन आयुक्त ज्ञानेश कुमारको राजीनामा माग गरिएको थियो। प्रदर्शनका क्रममा प्रहरीले इमरानलाई केही समय नियन्त्रणमा लिएको थियो। त्यसपछि भारतीय जनता पार्टीका नेता किरीट सोमैयाले इमरान अमेरिकी नागरिक भएर पनि राजनीतिक प्रदर्शनमा सहभागी भएको भन्दै प्रहरीमा उजुरी दिएका थिए।

प्रहरीले उक्त उजुरी विदेशी दर्ता कार्यालयमा पठाएपछि अध्यागमन तथा विदेशी नागरिकसम्बन्धी ऐनअन्तर्गत कारबाही अघि बढाइएको हो। भारतीय समाचार संस्था पीटीआईका अनुसार इमरानसँग अमेरिकी राहदानी र ओभरसिज सिटिजन अफ इन्डिया कार्ड छ। मुम्बई प्रहरीले भारतीय नागरिक नभए पनि प्रदर्शनमा भाग लिएकाले सम्बन्धित कानुनी प्रावधानअनुसार कारबाही गरिएको जनाएको छ।

इमरान मुम्बईको खार क्षेत्रमा बस्दै आएका छन्।