आँबुखैरेनीमा हलगोरु पाल्ने ४६ किसानलाई अनुदान

तनहुँको आँबुखैरेनी गाउँपालिकाले हलगोरु पाल्ने किसानलाई प्रोत्साहन गर्न अनुदान वितरण कार्यक्रम सुरु गरेको छ। गाउँपालिकाको नीति तथा कार्यक्रमअनुसार पहिलो चरणमा वडा नम्बर १ का ४६ जना हलगोरु पालक किसानलाई जनही ७ हजार रुपैयाँका दरले अनुदान दिइएको छ। वडाध्यक्ष प्रेम गुरुङका अनुसार यो कार्यक्रमअन्तर्गत किसानलाई कुल ३ लाख २२ हजार रुपैयाँ वितरण गरिएको छ।

कृषिमा आधुनिक प्रविधिको प्रयोग बढे पनि ग्रामीण भेगमा खेतबारी जोत्न हलगोरुको भूमिका अझै रहेकाले यो कार्यक्रम ल्याइएको हो। हलगोरु पाल्ने परम्परागत संस्कृतिको संरक्षण र किसानलाई पशुपालनमा प्रोत्साहन गर्नु पनि कार्यक्रमको उद्देश्य हो। पशुपालनमा लागत र चुनौती दुवै बढ्दै गएका बेला यो सहयोगले किसानलाई हलगोरु पाल्न थप हौसला दिने अपेक्षा गरिएको छ।