हिमालमा आंशिक बदली, भोलि पहाड–हिमालमा वर्षा/हिमपातको सम्भावना

जल तथा मौसम विज्ञान विभागले आज हिमाली भेगमा आंशिक बदली रहने र पहाडी तथा तराई क्षेत्रमा मौसम प्रायः सफा रहने पूर्वानुमान गरेको छ। गण्डकी, कर्णाली र सुदूरपश्चिमका हिमाली भेगमा भने एक-दुई ठाउँमा हल्का वर्षा वा हिमपात हुन सक्ने विभागले जनाएको छ। विभागका अनुसार हाल देशमा पश्चिमी वायुसँगै स्थानीय वायुको पनि आंशिक प्रभाव परेको छ।

भोलि हिमाली र पहाडी भेगमा सामान्यतया बदली रहने अनुमान छ। गण्डकी, लुम्बिनी, कर्णाली र सुदूरपश्चिमका हिमाली र पहाडी क्षेत्रमा केही ठाउँमा तथा कोशी र बागमतीका यस्तै भेगमा एक-दुई ठाउँमा चट्याङसहित मध्यम वर्षा वा हिमपात हुन सक्ने विभागले जनाएको छ। लुम्बिनी र सुदूरपश्चिमको तराईमा आंशिक बदली रहँदै एक-दुई स्थानमा मध्यम वर्षाको सम्भावना छ।

बाँकी तराईमा भने मौसम प्रायः सफा रहने छ। विभागका अनुसार काठमाडौँको तापक्रम १४ डिग्री सेल्सियस रहने अनुमान छ। पोखरा र वीरेन्द्रनगरमा १६, विराटनगर र जनकपुरमा २० तथा नेपालगञ्जमा २१ डिग्री सेल्सियस तापक्रम रहने पूर्वानुमान छ।

विराटनगरमा बिहान तुवाँलो लाग्ने र पोखरामा आंशिक बदली रहने विभागले जनाएको छ। विभागले सूचीमा राखेका छवटै प्रमुख सहरमा आज वर्षाको सम्भावना ० प्रतिशत छ।