रौतहटमा सेनाद्वारा दसैँ लक्षित परम्परागत लिङ्गे पिङ

नेपाली सेनाको श्री नारायणदल गणले दसैँलाई लक्षित गर्दै रौतहटको चन्द्रपुर नगरपालिका–४ शान्ति टोलस्थित एकता मैदानमा परम्परागत लिङ्गे पिङ बनाएको छ। बाँस, काठ र डोरी प्रयोग गरेर पुरानै शैलीमा पिङ तयार पारिएको सेनाले जनाएको छ। लोप हुँदै गएको मौलिक परम्परा र लोकसंस्कृतिको संरक्षण गर्ने उद्देश्यले पिङ बनाइएको सेनाको भनाइ छ।

करिब एक दशकअघिसम्म सहर र गाउँका बस्तीमा दसैँ सुरु हुनुअघि नै पिङ हालिने चलन थियो। आधुनिकता र प्रविधिको प्रभाव बढेसँगै यस्तो चलन घट्दै गएको छ। पिङ तयार भएपछि टोलका बासिन्दा पिङ खेल्न जम्मा हुन थालेका छन्।

बालबालिकादेखि वृद्धवृद्धासम्म एकै ठाउँमा भेला हुँदा समुदायमा आत्मीयता बढ्ने र नयाँ पुस्ताले पुर्ख्यौली संस्कृति चिन्ने आयोजकको विश्वास छ। दसैँमा एकपटक भए पनि खुट्टा भुइँबाट उचाल्नुपर्छ भन्ने विश्वास नेपाली समाजमा पुरानै हो। पिङलाई मनोरञ्जनसँगै सामाजिक एकता, सद्भाव र भाइचाराको प्रतीक मानिन्छ।

सेनाले बनाएको पिङले स्थानीयलाई चाडको उल्लास दिनुका साथै आन्तरिक पर्यटकलाई पनि आकर्षित गर्ने अपेक्षा गरिएको छ।