यमनमा द्वन्द्वले करिब ८ लाख मानिस खाद्य सहायताबाट वञ्चित: डब्लुएफपी

संयुक्त राष्ट्रसङ्घीय विश्व खाद्य कार्यक्रम, डब्लुएफपीले यमनमा बढ्दो द्वन्द्वका कारण ८ लाख मानिस जीवनरक्षक खाद्य सहायताबाट वञ्चित भएको जनाएको छ। युद्धका अग्रमोर्चा निरन्तर सरिरहनु, सडक अवरुद्ध हुनु र सुरक्षा अवस्था बिग्रिनुले प्रमुख क्षेत्रमा राहत पुर्‍याउन कठिन भएको कार्यक्रमले जनाएको छ। डब्लुएफपीका अनुसार देशको तेस्रो ठूलो सहर ताइजमा अवस्था सबैभन्दा गम्भीर छ।

लडाइँ र सडक बन्द हुने खतराले हजारौँ विस्थापित परिवार रहेका बस्तीमा राहतकर्मी पुग्नै सकेका छैनन्। ताइजमै ६ लाखभन्दा बढी मानिसले खाद्य सहायता पाउन सकेका छैनन्, जसमध्ये करिब २ लाख महिला र बालबालिका छन्। ताइजबाहेक पश्चिमी तटीय भेगमा पनि हालै राहत पहुँचमा अवरोध आएको छ।

खाद्य सङ्कट गहिरिँदै गएका क्षेत्रमा पिठोको मौज्दात सकिन थालेको छ भने स्थानीय बजारमा खाद्यान्नको उपलब्धता घट्दै गएको छ।