दिल्लीमा प्रदर्शन रिपोर्टिङ गर्दा ३० भन्दा बढी पत्रकार नियन्त्रणमा

भारतको राजधानी नयाँ दिल्लीमा मतदाता नामावली संशोधनविरुद्धको प्रदर्शन रिपोर्टिङ गरिरहेका ३० जनाभन्दा बढी पत्रकारलाई प्रहरीले केही समय नियन्त्रणमा लिएको छ। विभिन्न प्रेस स्वतन्त्रता समूहले यो सङ्ख्या सार्वजनिक गर्दै पत्रकारमाथि कुटपिट र दुर्व्यवहार भएको आरोप लगाएका छन्। सप्ताहान्तमा भएको उक्त प्रदर्शनमा मुख्य रूपमा युवाहरू सहभागी थिए।

पत्रकार र प्रेस स्वतन्त्रताका पक्षधर संस्थाहरूले दिल्ली प्रहरीको व्यवहारलाई प्रेस स्वतन्त्रतामाथिको ठाडो प्रहार भनेका छन्। उनीहरूले यस घटनाले भारतमा प्रेस स्वतन्त्रताको अवस्थाबारे गम्भीर चिन्ता बढाएको बताएका छन्। कमिटी टु प्रोटेक्ट जर्नालिस्ट्स अर्थात् सीपीजेले घटनालाई भारतको लोकतान्त्रिक परम्परामा लागेको धब्बा भनेको छ।

संस्थाले पत्रकारको सुरक्षा सुनिश्चित गर्न र जिम्मेवार प्रहरी अधिकारीलाई जवाफदेही बनाउन भारतीय अधिकारीसँग माग गरेको छ। प्रधानमन्त्री नरेन्द्र मोदीको कार्यकालमा प्रेसमाथि दबाब बढेको आरोप लाग्दै आए पनि यसपटक नियन्त्रणमा लिइएका पत्रकारको सङ्ख्या असामान्य रहेको प्रकाशित विवरणमा उल्लेख छ।