गोरखाको ऐतिहासिक लिगलिगे दौड रोक्न प्रशासनको आग्रह

गोरखाको पालुङटार नगरपालिकामा हुने ऐतिहासिक लिगलिगे दौड नगर्न जिल्ला प्रशासन कार्यालय गोरखाले आयोजक बन्न खोज्ने दुवै पक्षलाई आग्रह गरेको छ। नगरपालिकाले असोज २९ गते आफ्नै आयोजनामा दौड राखेको थियो भने त्यसलाई चुनौती दिँदै लिगलिगकोट विकास अभियानले असोज ३० गते छुट्टै दौड घोषणा गरेको थियो। आयोजकबारे विवाद रहेकाले सुरक्षा निकाय सहभागी गराउन र पर्याप्त सुरक्षा दिन नसकिने प्रशासनले बुधबार साँझ पठाएको पत्रमा उल्लेख छ।

दुवै पक्षसँगको छलफलमा सहमति जुट्न नसकेपछि प्रशासनले यो पत्राचार गरेको हो। दौडको आयोजना यसअघि लिगलिगकोट विकास अभियानले गर्दै आएको थियो। नगरपालिकाले त्यसलाई आफ्नो अपनत्वमा सञ्चालन गर्ने निर्णय गरेपछि दुई पक्षबीच विवाद चर्किएको हो।

आयोजक आफू नै हुनुपर्ने अडानमा दुवै पक्ष छन्। नगरपालिकाले यसअघि पनि दौड आफैँ चलाउने निर्णय गरेको थियो, तर अभियानले अवरोध गरेपछि पछिल्ला दुई वर्षदेखि दौड हुन सकेको छैन। यस वर्ष पनि दुवै पक्षले आफ्नै मितिमा तयारी गरेपछि विवाद फेरि सतहमा आएको हो।

लिगलिगकोटमा राजा छान्न दौड गराइने र विजेतालाई गद्दी सुम्पिने परम्परा रहेको ऐतिहासिक मान्यता छ। गोरखा राज्यका संस्थापक द्रव्य शाहले पनि यही दौड जितेर लिगलिगकोटको गद्दी पाएको भनिन्छ।