एनपीएल सिजन ३: ओमोडा जेइकू प्रायोजक, केभिन ओब्रायन विश्लेषक

नेपाल प्रिमियर लिग अर्थात् एनपीएलको तेस्रो संस्करणका लागि ओमोडा जेइकू ‘पावर्ड बाइ’ प्रायोजक बनेको छ। नेपालमा यो ब्रान्डको आधिकारिक वितरक एसपीजी अटोमोबाइल्सले नेपाल क्रिकेट संघ, क्यानसँगको साझेदारी विस्तार गरेको हो। सन् २०२४ को पहिलो संस्करणदेखि ओमोडा जेइकू ‘ड्रिभन बाइ’ साझेदारका रूपमा जोडिँदै आएको थियो।

प्रतियोगिताभर उत्कृष्ट प्रदर्शन गर्ने खेलाडीलाई गाडी पुरस्कार दिने क्रम यस वर्ष पनि कायम राखिने कम्पनीले जनाएको छ। यता, आयरल्यान्डका पूर्व क्रिकेटर केभिन ओब्रायन एनपीएलको विशेष प्रसारणका लागि हिमालयन स्पोर्ट्समा विज्ञ विश्लेषकका रूपमा आबद्ध भएका छन्। सन् २०११ को विश्वकपमा बेङ्गलुरुमा इङ्ल्यान्डले दिएको ठूलो लक्ष्य पछ्याउँदै उनले त्यतिबेलाको सबैभन्दा छिटो विश्वकप शतक बनाएका थिए।

ओब्रायन सन् २०२४ को पहिलो एनपीएलमा विराटनगर किङ्सका मुख्य प्रशिक्षक थिए। उनी नेपालका विभिन्न फ्रेन्चाइज प्रतियोगितामा खेलिसकेका छन्। ‘रेड बुल क्रिकेट लाइभ’ कार्यक्रम पूर्व स्टार स्पोर्ट्स प्रस्तोता नवनीत कृष्णले सञ्चालन गर्नेछन्।

नेपालका पूर्व राष्ट्रिय खेलाडी बर्दन चालिसे पनि विश्लेषक समूहमा रहनेछन्। चालिसे लुम्बिनी अल स्टार्सका पूर्व सहलगानीकर्ता हुन् र उनले जनकपुर बोल्ट्सको क्रिकेट निर्देशकको जिम्मेवारी पनि सम्हालिसकेका छन्। थप स्वदेशी र विदेशी क्रिकेट व्यक्तित्वलाई प्यानलमा समेट्ने र त्यसको घोषणा छिट्टै गर्ने हिमालयन स्पोर्ट्सले जनाएको छ।