फिफा विश्वकप २०३० को विशेष प्रसारण अधिकार नेटफ्लिक्सलाई

सन् २०३० को फिफा विश्वकप स्पेन र एन्डोरामा प्रसारण गर्ने विशेष अधिकार स्ट्रिमिङ कम्पनी नेटफ्लिक्सले पाएको छ। नेटफ्लिक्सले मंगलबार यो सम्झौताको घोषणा गरेको हो। सम्झौताअनुसार प्रतियोगिताका सबै १०४ खेल प्रत्यक्ष प्रसारण हुनेछन्।

खेलअघि, मध्यान्तर र खेलपछिका कार्यक्रम, खेल हुने दिनको दैनिक सारांश तथा प्रतियोगिता सुरु हुनुअघिका थप कार्यक्रम पनि यसमा समेटिएका छन्। तर नेटफ्लिक्सले सम्झौताका शर्त सार्वजनिक गरेको छैन। विश्वकपको सय वर्ष पूरा हुने यो संस्करण पूर्वविजेता स्पेनले मोरक्को र पोर्चुगलसँग मिलेर आयोजना गर्नेछ।

नेटफ्लिक्सकी प्रमुख सामग्री अधिकारी बेला बजारीयाले विश्वकपजस्ता मानिसलाई एकजुट गराउने घटना विरलै हुने बताउनुभएको छ। स्पेन र एन्डोराभरिका समर्थकसम्म हरेक खेल पुर्‍याउन पाउँदा कम्पनी निकै उत्साहित भएको पनि उहाँले बताउनुभएको छ।