काठमाडौँ भित्रिए खसीबोका र च्याङ्ग्रा, बजारमा चहलपहल कम

दसैँका लागि काठमाडौँको कलंकी खसीबजारमा विभिन्न जिल्लाबाट खसीबोका र हिमाली भेगबाट च्याङ्ग्रा आइपुगे पनि ग्राहकको चहलपहल अघिल्ला वर्षभन्दा कम देखिएको छ। व्यापारीहरूका अनुसार दाङ, सल्यान, सुर्खेत, दैलेख, बैतडी, उदयपुरलगायत जिल्लाबाट खसीबोका ल्याइएका छन्। कलंकीमा जिउँदो खसीको मूल्य प्रतिकिलो करिब ७८० देखि ९०० रुपैयाँसम्म रहेको व्यापारीहरू बताउँछन्।

जिउँदो च्याङ्ग्राको मूल्य भने प्रतिकिलो करिब १ हजार ३०० रुपैयाँ तोकिएको छ। कलंकीस्थित चौपाया खरिदबिक्री केन्द्रका अध्यक्ष जीवनराज खतिवडाका अनुसार अहिले दैनिक करिब ४०० खसीबोका बजारमा भित्रिरहेका छन्। फुलपातीदेखि दैनिक एक हजारभन्दा बढी चौपाया भित्रिने र बिक्री बढ्ने उहाँको अनुमान छ।

करिब ८–९ वर्षदेखि कलंकीमा व्यापार गर्दै आएका चितवनका रामहरि थापा क्षेत्रीका अनुसार गत वर्षभन्दा खसीको मूल्य बढेको छ। भक्तपुरको सल्लाघारीमा पनि मुस्ताङबाट ल्याइएका च्याङ्ग्राको बिक्री सुरु भएको छ। त्यहाँ जिउँदो च्याङ्ग्रा प्रतिकिलो करिब १ हजार २५० देखि १ हजार ३०० रुपैयाँसम्ममा बिक्री भइरहेको छ।

व्यापारी मेखबहादुर नेपालका अनुसार यसपटक च्याङ्ग्रा खरिद र ढुवानीमा कठिनाइ भएको छ र गत वर्षभन्दा प्रतिगोटा मूल्य करिब ३ हजार रुपैयाँसम्म बढेको छ।