प्रधानमन्त्री शाहद्वारा पलाञ्चोक भगवतीको दर्शन

प्रधानमन्त्री बालेन्द्र शाहले बडादसैँको चौथो दिन बुधबार काभ्रेपलाञ्चोकको पाँचखाल नगरपालिकामा रहेको पलाञ्चोक भगवती मन्दिर पुगेर पूजाअर्चना र दर्शन गर्नुभएको छ। पाँचखाल नगरपालिका–९ का वडाध्यक्ष रामकाजी श्रेष्ठका अनुसार प्रधानमन्त्री बुधबार बिहान करिब १० बजे भगवती दर्शनका लागि मन्दिर परिसरमा आइपुग्नुभएको थियो। भगवतीको दैनिक नित्य पूजा भइरहेका बेला पुगेर दर्शन गरेपछि उहाँ फर्कनुभएको वडाध्यक्ष श्रेष्ठले जानकारी दिनुभएको छ।

प्रधानमन्त्रीसँगै पूर्वाधार विकासमन्त्री सुनील लम्साल र प्रधानमन्त्रीका प्रमुख सल्लाहकार कुमार ब्यञ्जनकार पनि भ्रमण टोलीमा सामेल हुनुहुन्थ्यो। प्रधानमन्त्री र उहाँको टोली सडकमार्ग हुँदै पलाञ्चोकसम्म पुगेको थियो। उहाँको भ्रमणबारे जिल्लामा रहेका सुरक्षा निकायलाई समेत पहिले नै कुनै जानकारी गराइएको थिएन।

पलाञ्चोक भगवतीलाई नेपालका प्रसिद्ध शक्तिपीठमध्ये एक मानिन्छ, र दसैँको नवरात्रमा यहाँ विशेष पूजाअर्चना हुन्छ। नवरात्र सुरु भएसँगै मन्दिरमा धार्मिक गतिविधि बढ्ने गरेको छ र देवीको दर्शन गर्न भक्तजन ठूलो सङ्ख्यामा आउने गर्छन्। प्रत्येक वर्ष नवरात्रको अष्टमीका दिन राष्ट्रप्रमुख स्वयं यस मन्दिरमा पुगेर दर्शन गर्ने परम्परा रहँदै आएको छ।