खसीको मूल्य: कपिलवस्तुका किसानलाई अपेक्षित दाम छैन, मोरङमा मासुको अधिकतम मूल्य तोकियो

दसैँको मुखमा कपिलवस्तुका किसानले खसीबोकाको अपेक्षित मूल्य नपाएको गुनासो गरेका छन् भने मोरङमा प्रशासनले खसीको मासुको अधिकतम मूल्य तोकेको छ। कपिलवस्तुको चन्द्रौटा पशु हाटबजारमा बिक्रीका लागि खसीबोका प्रशस्त आए पनि किन्ने मानिस कम छन्। वर्षभरि पालेको पशु बेचेर चाडको खर्च जुटाउने किसान यसपालि निराश भएका छन्।

स्थानीय किसान चित्रबहादुर श्रीपालीले मङ्गलबार करिब १७ हजार रुपैयाँ माग गरेको बोका करिब ११ हजार रुपैयाँमै बेच्नुपरेको बताउनुभएको छ। शिवराज नगरपालिका–४ चनईका इरफान खानले उत्पादन लागतअनुसार दाम नपाएको गुनासो गर्नुभएको छ। नेपाल–भारत खुला सीमामा सुरक्षा कडा भएपछि अवैध रूपमा खसीबोका भित्रिने क्रम पनि घटेको छ।

उता, जिल्ला प्रशासन कार्यालय मोरङले शुक्रबार सूचना जारी गर्दै प्रतिकिलो खसीको मासु १ हजार २०० रुपैयाँभन्दा महँगोमा बेच्न नपाइने जनाएको छ। विराटनगरका व्यापारीले करिब १ हजार ३०० रुपैयाँमा बेच्दै आएको मासुको मूल्य मङ्गलबारदेखि प्रतिकिलो करिब १ हजार ४०० रुपैयाँ पुर्‍याएपछि प्रशासनले हस्तक्षेप गरेको हो। तोकिएभन्दा बढी मूल्य लिएको भेटिए कारबाही गरिने चेतावनी प्रशासनले दिएको छ।

प्रमुख जिल्ला अधिकारी युवराज कटेलले अस्वाभाविक मूल्यवृद्धिको गुनासो आएपछि मूल्य तोक्नुपरेको बताउनुभएको छ।