साउदी अरबमाथि हुथी आक्रमणको सुरक्षा परिषद्द्वारा निन्दा

संयुक्त राष्ट्रसङ्घीय सुरक्षा परिषद्ले साउदी अरबमाथि यमनका हुथी विद्रोहीले गरेका आक्रमणको कडा निन्दा गरेको छ। परिषद्ले बिहीबार जारी गरेको अध्यक्षीय वक्तव्यमा नागरिक उड्डयन र ऊर्जा पूर्वाधारलाई निशाना बनाइएको उल्लेख छ। सदस्य राष्ट्रहरूले हुथीलाई यमनमा जारी सैन्य गतिविधि तुरुन्त रोक्न माग गरेका छन्।

उनीहरूले लाल सागर र बाब अल मन्डेब जलमार्गमा व्यापारिक जहाजमाथिका आक्रमण र धम्कीप्रति गम्भीर चिन्ता जनाएका छन्। वक्तव्यमा जहाज र चालक दलको सुरक्षा सुनिश्चित गर्न तथा समुद्री कानूनबारे राष्ट्रसङ्घीय महासन्धि पालना गर्न आग्रह गरिएको छ। परिषद्ले समुद्री मार्गमा आवागमनको स्वतन्त्रता कायम राख्नुपर्ने पनि बताएको छ।

पछिल्लो एक साताभित्र रियादको मुख्य विमानस्थल पटक-पटक आक्रमणको निशानामा परेको छ। हुथीले प्रहार गरेका क्षेप्यास्त्र र ड्रोन साउदीका विमानस्थल, तेल प्रशोधन केन्द्र र पाइपलाइनसम्म पुगिरहेका छन्। प्रकाशित समाचारअनुसार साउदी अरबको रक्षा खर्च करिब ८३ अर्ब अमेरिकी डलर छ।

उसले अमेरिकाबाट अत्याधुनिक लडाकू विमान र क्षेप्यास्त्र रोक्ने प्रणाली तथा युरोपबाट आधुनिक हतियार खरिद गर्छ। अमेरिकी सञ्चारमाध्यम सिएनएनका अनुसार विशाल भूगोल र चारैतिरबाट आइरहेको खतराका कारण साउदीलाई यस्ता आक्रमण रोक्न कठिन भएको छ।