गाजामा मानवीय सहायताको पहुँच खोल्न चीनको आग्रह

गाजा पट्टीमा मानवीय सहायता र अन्य सामग्री पूर्ण रूपमा पुग्न दिन चीनले इजरायलसँग आग्रह गरेको छ। चिनियाँ विदेशमन्त्री वाङ यीले बिहीबार अजरबैजानको बाकुमा इजरायली राष्ट्रपति आइज्याक हर्जोगसँगको भेटमा यस्तो आग्रह गर्नुभएको हो। उक्त भेट एसियामा अन्तरक्रिया र विश्वास निर्माणसम्बन्धी सम्मेलनको सातौँ बैठकका क्रममा भएको हो।

चिनियाँ पक्षका अनुसार गाजाका करिब २० लाख सर्वसाधारणलाई मानवीय सङ्कटबाट बचाउन तत्काल कदम चाल्नुपर्नेमा वाङले जोड दिनुभएको छ। उहाँले वेस्ट ब्याङ्कमा बस्ती बसाउने र विस्तार गर्ने काम रोकेर त्यस्ता कदम फिर्ता लिन पनि आग्रह गर्नुभएको छ। प्यालेस्टिनी समस्या समाधानका लागि दुई राज्यको अवधारणा नै उचित बाटो भएको वाङको भनाइ छ।

उहाँका अनुसार इजरायली र प्यालेस्टिनी दुवै जनतालाई शान्तिपूर्वक बस्ने र आफ्नो स्वतन्त्र राज्य स्थापना गर्ने अधिकार छ। मध्यपूर्वमा दिगो शान्तिका लागि वार्ता र राजनीतिक समाधान आवश्यक रहेको पनि उहाँले उल्लेख गर्नुभएको छ।