दसैँको बेला खोकनामा परम्परागत सिकाली जात्रा

काठमाडौँ उपत्यकाको खोकनामा परम्परागत सिकाली जात्रा सम्पन्न भएको छ। स्थानीय नेवार समुदायको यो जात्रा आज श्रीकाली मन्दिरमा पुगेपछि विधिवत् रूपमा टुंगिएको हो। देशभर दसैँ मनाइँदा खोकनाका बासिन्दा भने आफ्नै मौलिक पर्वमा व्यस्त रहन्छन्।

सिकाली चौरको मन्दिर परिसरमा भेला भएर उनीहरूले पूजा, देवी नृत्य र सामूहिक भोज गर्ने चलन छ। यो जात्रा घटस्थापनादेखि नवमीसम्म चलाउने परम्परा छ। स्कन्दपुराणको माघ माहात्म्यमा वर्णित दक्ष प्रजापतिको यज्ञसम्बन्धी कथा यस जात्राको आधार हो।

कथाअनुसार महाकाली र वीरभद्रसहितका गणले यज्ञ नष्ट गरी देवताहरूलाई भगाएका थिए। त्यही प्रसङ्ग सम्झँदै बिहानै चौरमा यज्ञमण्डप बनाएर यज्ञ गरिन्छ। त्यसपछि महाकाली र वीरभद्रले यज्ञ भत्काएको दृश्य जात्रामा देखाइन्छ।

दसैँको सुरुआत खोकनाबाटै भएको जनविश्वास भए पनि यहाँका मानिस चलनअनुसार दसैँ मनाउँदैनन्। उनीहरू दसैँको टीका नलगाई आफ्नै सांस्कृतिक पहिचानअनुसार पर्व मनाउँछन्। खोकनावासीले यो जात्रालाई आफ्नो मूल पर्वका रूपमा लिने गरेका छन्।