जापानमा ९.९ म्याग्निच्युडको गलत भूकम्प चेतावनी, आठ मिनेटमै फिर्ता

जापानको मौसम विज्ञान एजेन्सीले शुक्रबार ९.९ म्याग्निच्युडको शक्तिशाली भूकम्प आउन सक्ने गलत चेतावनी जारी गरेको थियो। करिब आठ मिनेटमै एजेन्सीले उक्त चेतावनी फिर्ता लिएको छ। रुसको कामचट्का प्रायद्वीप नजिक गएको भूकम्पपछि यो चेतावनी जारी भएको थियो।

एजेन्सीले उक्त भूकम्प ६.९ म्याग्निच्युडको मापन गरेको छ भने युरोपेली–भूमध्यसागरीय भूकम्प मापन केन्द्रले ७.० म्याग्निच्युड जनाएको छ। एजेन्सीका अनुसार भूकम्पको केन्द्र जमिनमुनि करिब १६० किलोमिटर गहिराइमा थियो। स्थानीय समयअनुसार दिउँसो १२:४० बजे होक्काइडोदेखि मध्य जापानको तोकाई क्षेत्रसम्म कडा कम्पन हुन सक्ने सूचनासहित मोबाइल फोन र सार्वजनिक प्रणालीमा अलार्म बजेको थियो।

एजेन्सीले १२:४८ बजे चेतावनी रद्द गरेको छ। प्रवक्ताका अनुसार प्रणालीले केन्द्रबिन्दु कुरिल टापुतिर रहेको ठानेको र म्याग्निच्युड पनि धेरै बढाएर आकलन गरेकाले त्रुटि भएको हो। एजेन्सीले क्षमा माग्दै कारणबारे अनुसन्धान भइरहेको जनाएको छ।

यसमा साइबर आक्रमणको सम्भावना नरहेको पनि एजेन्सीले स्पष्ट पारेको छ। जापानमा ठूलो कम्पन महसुस भएको छैन र सुनामीको कुनै चेतावनी जारी गरिएको छैन।