सरकारले तोक्यो गहुँको न्यूनतम समर्थन मूल्य

सरकारले चालु आर्थिक वर्ष २०८३/८४ का लागि गहुँको न्यूनतम समर्थन मूल्य प्रतिक्विन्टल ४ हजार १०७ रुपैयाँ कायम गरेको छ। कृषि, वन तथा पर्यावरण मन्त्रालयको प्रस्तावअनुसार असोज ३० गते शुक्रबार बसेको मन्त्रिपरिषद् बैठकले यो निर्णय गरेको सञ्चार तथा सूचना प्रविधिमन्त्री डा. विक्रम तिमिल्सिनाले जानकारी दिनुभएको छ।

गत वर्ष यस्तो मूल्य प्रतिक्विन्टल ३ हजार ९४५ रुपैयाँ थियो र यसपटक १६२ रुपैयाँ थपिएको छ। मूल्य तोक्नुअघि कृषि विभागले सातै प्रदेशमा प्राविधिक टोली पठाएको थियो। बिउ, मल, ज्याला, मुद्रास्फीति र बजार भाउ केलाएर उत्पादन लागतका आधारमा मूल्य निकालिएको विभागले जनाएको छ।

यसका लागि समर्थन मूल्य र खरिद मूल्य निर्धारणसम्बन्धी २०८२ को निर्देशिकालाई आधार मानिएको छ। किसानलाई उत्पादनमा उत्साहित गर्न र उचित भाउको सुनिश्चितता दिन सरकारले हरेक वर्ष बाली लगाउनुअघि नै यो मूल्य घोषणा गर्दै आएको छ। सोही बैठकले बुढीगण्डकीको बाढीबाट अति प्रभावित गोरखाका चुमनुब्री, धार्चे र आरूघाट गाउँपालिका तथा धादिङको त्रिपुरासुन्दरी गाउँपालिकाको वडा १ र २ लाई तीन महिनाका लागि विपद् सङ्कटग्रस्त क्षेत्र तोकेको छ।

असोज ८ देखि ११ गतेसम्मको वर्षापछिको बाढी र पहिरोबाट प्रभावित बागलुङका गलकोट र ढोरपाटन नगरपालिका पनि सङ्कटग्रस्त क्षेत्रमा थपिएका छन्। बैठकले कालीमाटी फलफूल तथा तरकारी बजार विकास समितिको गठन आदेशको चौथो संशोधन र दाना पदार्थसम्बन्धी नियमावलीको दोस्रो संशोधन पनि स्वीकृत गरेको छ।