मस्कले सार्वजनिक गरे उड्न सक्ने नयाँ रोडस्टर कार

टेस्लाका प्रमुख कार्यकारी अधिकृत एलन मस्कले छोटो उडान भर्न सक्ने थ्रस्टरयुक्त नयाँ रोडस्टर कार प्रदर्शन गर्नुभएको छ। बिहीबार अमेरिकाको टेक्सासमा रहेको स्पेसएक्सको परीक्षण केन्द्रमा भएको कार्यक्रम टेस्लाको एक्स खाताबाट प्रत्यक्ष देखाइएको थियो। प्रदर्शनमा कार ठाडो र्‍याम्पबाट उफ्रिएर फेरि आफ्नै पाङ्ग्रामा जमिनमा झरेको थियो।

सार्वजनिक गरिएको अर्को भिडियोमा कारले ५ वटा टेस्ला गाडीमाथिबाट उडेर हावामा पूरै फन्को मारेको देखिन्छ। प्रदर्शनपछि मस्कले उड्ने कार अब वास्तविक भएको बताउनुभएको छ। सफलताको ग्यारेन्टी नभए पनि यसले काम गर्ने सम्भावना रहेको उहाँको भनाइ छ।

मस्कका अनुसार कारमा अत्यन्त उच्च चापको हावा भरिएको ट्याङ्की छ, जसको दबाबले गाडीलाई माथि धकेल्छ। कार निर्माता टेस्ला र रकेट कम्पनी स्पेसएक्सको सहकार्यले यो प्रविधि सम्भव भएको उहाँले बताउनुभएको छ। मस्कका अनुसार यो कार सन् २०२८ मा उत्पादनमा जानेछ।

प्राविधिक र नियामक चुनौती कायमै रहे पनि विद्युतीय मोटर र ब्याट्रीमा भएको प्रगतिले उड्ने कारको अवधारणाप्रति चासो बढाएको छ।