पश्चिमी वायुको आंशिक असर: हिमालमा हल्का वर्षा–हिमपात, भोलि तराईमा कुहिरो

देशमा पश्चिमी वायुको आंशिक प्रभाव रहेका बेला आज हिमाली भेगका एक-दुई ठाउँमा चट्याङसहित हल्का वर्षा वा हिमपात हुन सक्ने जल तथा मौसम विज्ञान विभागले जनाएको छ। कोशी, बागमती र गण्डकी प्रदेशका पहाडी भेगका एक-दुई ठाउँमा पनि चट्याङसहित हल्का पानी पर्न सक्ने विभागको पूर्वानुमान छ। यी तीन प्रदेशका हिमालमा प्रायः बादल रहनेछ भने अन्य प्रदेशका हिमाली भेगमा आंशिक बादल लाग्नेछ।

देशभरका पहाडी भेगमा पनि आंशिक बादल रहनेछ। मधेशसहित कोशी, बागमती र गण्डकीको तराईमा आंशिक बादल रहँदा लुम्बिनी र सुदूरपश्चिमको तराईमा आकाश प्रायः खुला रहनेछ। प्रमुख सहरमध्ये पोखरामा मात्र २० प्रतिशत वर्षाको सम्भावना छ र त्यहाँ तापक्रम २६ देखि २८ डिग्री सेल्सियस रहने अनुमान छ।

काठमाडौँमा २५ देखि २७, वीरेन्द्रनगरमा २८ देखि ३० र विराटनगरमा ३१ देखि ३३ डिग्री सेल्सियस तापक्रम रहने विभागले जनाएको छ। नेपालगञ्ज र जनकपुरमा तापक्रम ३२ देखि ३४ डिग्रीसम्म पुग्नेछ भने यी दुवै सहरमा वर्षाको सम्भावना छैन। भोलि बिहानपख तराईका केही स्थानमा हुस्सु र कुहिरो लाग्ने पूर्वानुमान छ।

सोही दिन कोशी, गण्डकी र कर्णालीका हिमाली भेगका एक-दुई ठाउँमा हल्का वर्षा वा हिमपात हुन सक्छ। कोशी, बागमती, गण्डकी र लुम्बिनीका पहाडमा आंशिक बादल रहँदा अन्य पहाडी भेगमा मौसम प्रायः सफा रहनेछ।