एनपीएल: अब टोलीमा बढीमा आठ विदेशी खेलाडी

नेपाल प्रिमियर लिग (एनपीएल) २०२६ मा प्रत्येक फ्रेन्चाइज टोलीले बढीमा आठ विदेशी खेलाडीसँग अनुबन्ध गर्न पाउने भएका छन्। अघिल्ला दुई संस्करणमा यो सीमा छ जनाको थियो। नेपाल क्रिकेट संघ (क्यान) का सचिव पारस खड्काले शनिबार कीर्तिपुरस्थित त्रिवि क्रिकेट मैदानमा आयोजित पत्रकार सम्मेलनमा यो जानकारी दिनुभएको छ।

खेल्ने एघारमा सात नेपाली र चार विदेशी खेलाडी अनिवार्य हुनेछन्। अन्तर्राष्ट्रिय क्रिकेट परिषद् (आईसीसी) बाट आधिकारिक स्वीकृति पाएपछि एनपीएलको विश्वसनीयता अन्तर्राष्ट्रिय स्तरमा पुगेको क्यानको दाबी छ। खड्काका अनुसार आईसीसीले एनपीएलका लागि पाँच मुख्य विषयमा अनिवार्य सर्त राखेको छ।

विदेशी खेलाडीको सहभागिता, अम्पायरिङ, सञ्चारमाध्यमको पहुँच र प्रतियोगिता सञ्चालनमा अब आईसीसीका मापदण्ड लागू हुनेछन्। सबै विदेशी खेलाडीले आफ्नो राष्ट्रिय बोर्डबाट अनापत्ति प्रमाणपत्र (एनओसी) लिनुपर्नेछ। आईसीसीको मान्यता नभएका र सम्बन्धित राष्ट्रिय बोर्डले स्वीकृति नदिएका प्रतियोगितालाई अस्वीकृत क्रिकेट मानिनेछ।

स्पट फिक्सिङ र म्याच फिक्सिङ रोक्न आईसीसीको भ्रष्टाचारविरोधी संहिता पूर्ण रूपमा लागू हुने र उल्लङ्घन गर्नेमाथि नियामक निकायमार्फत कारबाही हुने खड्काले बताउनुभएको छ। एनपीएललाई यसपटक फरक र नयाँ शैलीमा प्रस्तुत गरिने उहाँको भनाइ छ।