निर्देशन नमानेको भन्दै गृह मन्त्रालयले एन–प्याब्सन निलम्बन गर्‍यो

गृह मन्त्रालयले राष्ट्रिय निजी तथा आवासीय विद्यालय एसोसिएसन नेपाल, अर्थात् एन–प्याब्सनलाई अर्को निर्णय नभएसम्म निलम्बन गरेको छ। एन–प्याब्सन राष्ट्रिय निर्देशन ऐन, २०१८ अन्तर्गत स्वीकृति लिएर सञ्चालनमा रहेको संगठन हो। मन्त्रालयले शुक्रबार, कात्तिक १३ गते सार्वजनिक सूचना निकालेर निलम्बनको जानकारी दिएको हो।

सूचनाअनुसार संगठनले उक्त ऐनको दफा ५ अन्तर्गत मन्त्रालयले दिएका निर्देशन पटकपटक बेवास्ता गरेको पाइएको छ। संगठनका पदाधिकारीले नेपाल सरकारले स्वीकृत गरेको विधान र संस्थाको मूल उद्देश्यविपरीत काम गरेको मन्त्रालयको निष्कर्ष छ। मन्त्रालयले यही विषयमा असोज २३ गते सम्बन्धित पक्षलाई बोलाएर छलफल गराएको थियो।

त्यस बेला मन्त्रालयले पहिले जारी गरिएका निर्देशनअनुसार काम गर्न संगठनलाई आग्रह गरेको थियो। ती निर्देशनको निरन्तर उल्लंघन भएपछि ऐनको दफा ६ को उपदफा (२) प्रयोग गरी निलम्बनको निर्णय गरिएको मन्त्रालयले जनाएको छ। मन्त्रालयका अनुसार अब एन–प्याब्सनको नाम प्रयोग गरी कुनै पनि समूह वा गुटले गर्ने क्रियाकलाप गैरकानुनी मानिनेछ।

यस्ता क्रियाकलापमा संलग्न हुनेमाथि प्रचलित कानुनअनुसार कारबाही हुने चेतावनी पनि सूचनामा उल्लेख छ।