फोहोर पानी सिधै नदीमा नछोड्न उद्योगहरूलाई विभागको निर्देशन

उद्योग विभागले प्रशोधन नगरिएको फोहोर पानी नदी र खोलामा सिधै नछोड्न देशभरका उद्योगहरूलाई निर्देशन दिएको छ। वीरगञ्ज–पथलैया करिडोरको सिर्सिया नदी वरपरका उद्योगबाट निस्किएको प्रदूषित पानीले दीपावली र छठ मनाउन अप्ठ्यारो परेको स्थानीयको गुनासोपछि विभागले शुक्रबार सूचना जारी गरेको हो। विभागका अनुसार उद्योगहरूले मापदण्डविपरीत फोहोर पानी खोलामा बगाएर प्रदूषण बढाएको भन्दै उजुरी परेका छन्।

सूचनामा वातावरणीय मापदण्ड पूरा गर्ने गरी प्रशोधन गरेको पानी मात्र बाहिर पठाउन भनिएको छ। चाडपर्वका बेला उद्योगहरूलाई स्वच्छ पानी नदीमा पठाएर सहयोग गर्न पनि विभागले अनुरोध गरेको छ। निर्देशन पालना भए नभएको जाँच्न संयुक्त अनुगमन र निरीक्षण गरिने विभागले जनाएको छ।