इसिबी प्रमुख लेगार्डले कार्यकाल सकिनुअघि नै पद छाड्ने

युरोपेली केन्द्रीय बैंक इसिबीकी अध्यक्ष क्रिस्टिन लेगार्डले तोकिएको अवधिभन्दा नौ महिना पहिले, फेब्रुअरी ७ मा पदबाट बिदा लिने घोषणा गर्नुभएको छ। ७० वर्षीया लेगार्डको आठ वर्षको कार्यावधि सन् २०२७ को अक्टोबर ३१ सम्म थियो। उहाँले पदले माग्ने राजनीतिक तटस्थताको बन्धन हटेपछि मौद्रिक नीतिभन्दा बाहिरका विषयमा पनि खुलेर बोल्ने इच्छा व्यक्त गर्नुभएको छ।

इसिबीको नेतृत्व गर्न पाउनुलाई उहाँले गर्व र सौभाग्य भन्नुभएको छ। उहाँको निर्णयले युरोपेली सङ्घका नेतालाई सन् २०२७ को फ्रान्सेली राष्ट्रपतीय चुनावअघि नै नयाँ अध्यक्ष छान्ने मौका मिलेको छ। विश्लेषकहरूका अनुसार दक्षिणपन्थी उम्मेदवार मरिन ले पेनले चुनाव जितेमा नियुक्तिमा पर्न सक्ने प्रभावबाट जोगिन यो समय रोजिएको हो।

युरोपेली परिषद्का अध्यक्ष एन्टोनियो कोस्टाले नयाँ अध्यक्ष छनोटको प्रक्रिया तुरुन्तै सुरु गरिने बताउनुभएको छ। इसिबीले युरो मुद्रा चलाउने २१ देशका लागि ब्याजदर तोक्छ। त्यसको निर्णयले घर किन्नेदेखि उद्योग खोल्नेसम्मका लागि लिइने ऋणको लागत निर्धारण गर्छ।