भुटानमा निगरानीमा रहेको हिमताल फुट्यो, सडक र संरचनामा क्षति

भुटानको उत्तरी गासा जिल्लामा रहेको सिन्ताफु हिमताल फुटेपछि आएको बाढीले राजमार्ग र प्रसिद्ध तातोपानी परिसरमा क्षति पुर्‍याएको छ। डेली भुटानका अनुसार बिहीबार, अक्टोबर २९ को साँझ लाया गेओगको वाकिला पहाड नजिकको तालबाट पानी एक्कासि बाहिरिएको थियो। बाढीको पानी राति करिब सवा ८ बजे ताकत्सेमाखाङ पुगेको थियो।

मोछु नदीको किनारमा रहेको चर्चित गासा छाचु तातोपानी कुण्ड क्षेत्र बाढीले पूरै बगाएको छ। डेली भुटानका अनुसार पुनाखा–गासा राजमार्गको करिब ३१.८५ किलोमिटर बिन्दु नजिकको खण्ड पूर्ण रूपमा बगेको छ। अर्को सूचना जारी नभएसम्म सबै सवारीसाधनको आवागमन रोकिएको छ।

दुर्गम हिमाली बस्ती लाया जोड्ने सडक पनि अवरुद्ध भएको छ। जोखिम क्षेत्रका बासिन्दा, सेना, कर्मचारी र विद्यार्थीलाई सुरक्षित स्थानमा सारिएको छ र चेतावनी साइरन बजाइएको छ। भुटानको राष्ट्रिय जलविज्ञान तथा मौसम विज्ञान केन्द्रले मोछु र पुनात्साङछु नदीको जलस्तर निगरानी गरिरहेको छ।

सम्भावित गेग्रानको जोखिमका कारण पुनात्साङछु–२ जलविद्युत् आयोजनाले उत्पादन रोकेर बाँधका ढोका खोलेको छ। सिन्ताफु हिमतालमा उपकरण जडान गरेर निगरानी गरिँदै आएको थियो। यो पानी पुनात्साङछु हुँदै सङ्कोश नदीका रूपमा भारत पस्ने भएकाले भारतमा पनि सतर्कता अपनाइएको छ।

बाहिरिएको पानीको परिमाण र क्षतिको पूर्ण विवरण अझै पुष्टि भएको छैन।