रोनाल्डोको ९०८ दिनपछि ह्याट्रिक, हजार गोलको नजिक

पोर्चुगल र साउदी क्लब अल नासरका कप्तान क्रिस्टियानो रोनाल्डोले ९०८ दिनको अन्तरालपछि ह्याट्रिक गर्नुभएको छ। साउदी प्रो लिगअन्तर्गत बिहीबार भएको खेलमा उहाँले दोस्रो हाफमा तीन गोल गर्नुभयो। पहिलो हाफमा उहाँका दुई गोल रेफ्रीले अफसाइड भन्दै अस्वीकार गरेका थिए।

त्यो निर्णयमा रोनाल्डोले मैदानमै असन्तुष्टि देखाउनुभएको थियो। ६६औँ मिनेटमा पोर्चुगली सहकर्मी जोआओ फेलिक्सको पासमा गोल गर्दै उहाँले टोलीलाई अग्रता दिलाउनुभयो। छ मिनेटपछि ७२औँ मिनेटमा हेडरमार्फत उहाँले अग्रता दोब्बर बनाउनुभयो।

८१औँ मिनेटमा साडियो मानेको पासमा तेस्रो गोल गर्दै उहाँले ह्याट्रिक पूरा गर्नुभयो। यो उहाँको करियरको ६७औँ ह्याट्रिक हो। यसअघि उहाँले सन् २०२४ मे ४ मा अल वेहदाविरुद्ध ह्याट्रिक गर्नुभएको थियो।

यो ह्याट्रिकसँगै रोनाल्डोको करियरको कुल गोल ९८५ पुगेको छ। अब उहाँ एक हजार गोलको ऐतिहासिक उपलब्धिबाट १५ गोल मात्र टाढा हुनुहुन्छ। ४१ वर्षको उमेरमा उहाँले यो ह्याट्रिक गर्नुभएको हो।