इजरायल: अन्तिम परिणाममा नेतान्याहुको गठबन्धन बहुमतबाट टाढा

इजरायलको केन्द्रीय निर्वाचन समितिले सार्वजनिक गरेको अन्तिम परिणामअनुसार प्रधानमन्त्री बेन्जामिन नेतान्याहु नेतृत्वको गठबन्धन सरकार बनाउन आवश्यक बहुमतमा पुग्न सकेको छैन। परिणामअनुसार नेतान्याहु पक्षधर समूहले ५३, विपक्षी समूहले ४८ र अरब दलहरूले १९ सिट पाएका छन्। १२० सदस्यीय संसद् नेसेटमा सरकार बनाउन कम्तीमा ६१ सांसदको समर्थन चाहिन्छ।

द टाइम्स अफ इजरायलका अनुसार २७ सिट जितेको लिकुड पहिलो र गदी आइसेनकोट नेतृत्वको याशर २१ सिटसहित दोस्रो ठूलो दल बनेका छन्। बी’याचडले १२ र संयुक्त सूचीले ११ सिट जितेका छन् भने डेमोक्रेट्स र रामले आठ–आठ सिट पाएका छन्। सास र रिलिजियस जियोनिज्मको भागमा छ–छ सिट परेको छ।

मङ्गलबार भएको निर्वाचनमा ७७.९ प्रतिशत मतदाताले मतदान गरेका थिए। अरब नेतृत्वका दलका लागि १९ सिट ऐतिहासिक उपलब्धि मानिएको छ, तर प्रमुख यहुदी दलहरू उनीहरूको समर्थन लिन अनिच्छुक देखिएका छन्। नोभेम्बर ४ मा अन्तिम आधिकारिक परिणाम राष्ट्रपति आइज्याक हर्जोगलाई बुझाइनेछ।

राष्ट्रपतिले दलका प्रतिनिधिसँग परामर्श गरी सरकार बनाउन सक्ने सम्भावना बढी भएका उम्मेदवार छान्नुहुनेछ। नवनिर्वाचित नेसेटका सदस्यले नोभेम्बर १० मा शपथ लिनेछन्।